મીડિયાવાળા ત્યારે પણ રાષ્ટ્રવાદીઓની વાત સમજતા નહોતા, આજે પણ સ્થિતિ બદલાઈ નથી!

 મીડિયાવાળા ત્યારે પણ રાષ્ટ્રવાદીઓની વાત સમજતા નહોતા,

આજે પણ સ્થિતિ બદલાઈ નથી!

 --------------------

1947ના અરસામાં રાષ્ટ્રવાદીઓ કોંગ્રેસની નીતિઓ સામે લાલબત્તી ધરતા હતા, મીડિયાએ ત્યારે રાષ્ટ્રવાદને મજાકનો વિષય બનાવ્યો હતો. રાષ્ટ્રવાદીઓ આજે આમ આદમી પાર્ટી સામે લાલબત્તી ધરે છે, મીડિયા આજે પણ સમજવા તૈયાર નથી

--------------------------------------------

ફાગણ સુદ આઠમ, સંવત 2078

10-03-2022, ગુરુવાર.

n  અલકેશ પટેલ

જે લોકો રાષ્ટ્રને ચાહે છે, જે લોકો રાષ્ટ્રવાદના મહત્ત્વને સમજે છે, જે લોકો પોતાના વર્તમાનની સાથે સાથે ભાવિ પેઢીઓની સલામતી અને સુખ બાબતે ચિંતિત હોય છે, જે લોકો મફતના રાજકારણ અને તેની પાછળ આવનાર આર્થિક બેહાલીને સમજે છે – એ તમામ લોકો આજે પંજાબ વિધાનસભા ચૂંટણીનાં પરિણામ જોઇને વ્યથિત છે. “ભારત તેરે ટુકડે હોંગે...” જેવાં સૂત્રો બોલનાર લોકોથી ભરેલી પાર્ટી પાકિસ્તાન સાથેની સરહદને અડીને આવેલા સંવેદનશીલ રાજ્યમાં સત્તા ઉપર આવે એનાથી મોટી ચિંતાનો વિષય આજે બીજો કોઈ ન હોવો જોઇએ.

રાજકીય સ્વતંત્રતા નજીક હતી તે સમયે કોંગ્રેસના ચાલ-ચલનને અનેક લોકો ઓળખી ગયા હતા. કેટલાક લોકો એમ વિચારીને કોંગ્રેસની સાથે રહ્યા કે કોંગ્રેસનું ચરિત્ર બદલાશે અને જો નહીં બદલાય તો તેઓ પોતાની હાજરીથી પક્ષનું ચરિત્ર બદલી નાખશે. કોંગ્રેસનું ચરિત્ર ન જ બદલાયું, કેમ કે એને ગળથૂથીમાં જ “અંગ્રેજોની નીતિ” મળી હતી. કોંગ્રેસ પક્ષ તૂટતો ગયો, સતત તૂટ્યો પણ તેમાંથી જે પક્ષો બન્યા એમાં પણ એ જ ગળથૂથીનાં લક્ષણો હયાત હોવાથી રાષ્ટ્ર અને સનાતન બંનેને હાંસિયામાં ધકેલવાનું, અને એથી આગળ ઘણાં રાજ્યમાં તો રાષ્ટ્ર અને સનાતનને ખતમ જ કરી દેવાનું વ્યવસ્થિત કાવતરું સતત ચાલતું રહ્યું. પંજાબમાં આજે સત્તા ઉપર આવેલા લોકો ભાગલાવાદી સાંકળની જ એક કડી છે

ખુશામતના રાજકારણે આ દેશને પારાવાર નુકસાન કર્યું છે. એ નુકસાનની હજુ તો ભરપાઈ નથી થઈ ત્યાં ખાલિસ્તાનવાદીઓ તેમજ ગૌભક્ષકોની સોડ ગરમ કરતા તત્વો સંવેદનશીલ સરહદી રાજ્યમાં સત્તાની ખુરશી ઉપર બેસી જશે. મારી આ વાત જો હું શિલાલેખ ઉપર કોતરીને લખી શકત તો એમ કરીને એ શિલાલેખ સાચવીને રાખત જેથી થોડા દાયકા કે થોડી સદી પછી પંજાબ સહિત આ દેશના લોકો પંજાબના આજના પરિણામની ચિંતા કરતી વખતે મારી વાતની ચર્ચા કરત.

મીડિયા એક પ્રકારે અતિશય અસ્થિર વ્યવસ્થાતંત્ર છે. મીડિયાને ચપ્પાની ધાર સાથે, તલવાર સાથે, બંદૂક સાથે સરખાવી શકાય. આ તમામ સાધનો બે રીતે કામ આવે – કાંતો બચાવ માટે અથવા નાશ માટે. મોટેભાગે અનુભવને આધારે એવું જોવા મળ્યું છે કે મીડિયામાં સાવ ટૂંકી દૃષ્ટિના લોકો વધારે હોય છે. એમને મન તાત્કાલિક લાભ જ સર્વસ્વ હોય છે. આવા ટૂંકી દૃષ્ટિવાળા મોટાભાગના મીડિયાવાળા તાત્કાલિક સફળતાથી મૂર્ખની જેમ ખુશખુશાલ થઈ જતા હોય છે અને એવા લોકોને માથે બેસાડીને નાચતા હોય છે. શું કહેવાની જરૂર છે કે આમ આદમી પાર્ટીએ છેલ્લા એક વર્ષથી જાહેરાતો સહિત વિવિધ રીતે વેરેલા પૈસા અત્યારે તેનો રંગ બતાવી રહ્યા છે!

મીડિયાની બીજી એક મોટી નબળાઈ રાષ્ટ્રવાદને ધિક્કારવાની છે. મીડિયામાં બેઠેલા તત્વોને સનાતન સંસ્કૃતિ પ્રત્યે સૂગ હોય છે, રાષ્ટ્રવાદ પ્રત્યે ધિક્કાર હોય છે. તેના બે સ્પષ્ટ કારણ છે – માર્ક્સવાદી-માઓવાદી માનસિકતા અને ગૌભક્ષકોની તેમજ મિશનરીઓની ચુંગાલ.

ટૂંકી દૃષ્ટિવાળા લોકોને લાંબાગાળાના અર્થતંત્ર અને રાષ્ટ્ર તરીકેની ઓળખ વિશે ગતાગમ હોતી નથી, અને કમનસીબે આવા લોકો મીડિયામાં વધારે છે. ડાબેરી બદમાશો આ ભોળા મીડિયાવાળાઓને આબાદ રીતે એવું સમજાવી જાય છે કે, સરકાર પાસે તથા ધનિકો પાસે નાણાના વૃક્ષો તેમજ ખાણો હોય છે અને એ લોકોએ ગરીબોને બધું મફત આપ્યા કરવું જોઇએ. અને ગાંડી માથે બેડાંની જેમ ભોળા મીડિયાવાળા આ વાતોને લઇને એજન્ડા ચલાવ્યા કરે છે. આ ભોળા મીડિયાવાળા હજુ આજ સુધી એ સમજી નથી શક્યા કે દુનિયામાં ક્યાંય મફતનું રાજકારણ કરતા તત્વો હંમેશ માટે ટક્યા નથી. બલ્કે આવા મફતિયા રાજકીય પક્ષોને કારણે જે તે દેશ-પ્રદેશ આર્થિક રીતે પાયમાલ થઈ જાય છે એ વાત ભોળા મીડિયાવાળાઓને હજુ સુધી કેમ સમજાઈ નથી એ આપણા માટે સમજવું મુશ્કેલ નથી જ, જેનાં કારણો ઉપર જણાવી દીધાં – મીડિયાકર્મીઓની ટૂંકી દૃષ્ટિ અને લાલચ.

આજના દિવસે પંજાબ વિધાનસભા ચૂંટણીનું પરિણામ બેહદ ચિંતાજકન છે. દેશને કોંગ્રેસી નીતિઓનાં ભયંકર પરિણામોમાંથી બહાર નીકળતા 70 વર્ષ જેવો લાંબો સમય લાગ્યો છે. આ સાત દાયકામાં દુનિયાના અનેક દેશ અલ્પ-વિકસિતમાંથી વિકસિત દેશ બની ગયા, ત્યારે આપણે ત્યાં 2014 પછી દરેક ઘરે ટોઇલેટ આપવાની યોજના ચલાવવી પડી હતી. પંજાબે તેની સ્થિતિમાંથી, ભૂતકાળમાંથી કશું શીખવાને બદલે એવી અસાધારણ ભૂલ કરી છે કે તેની અવળી અસરમાંથી નીકળવા માટે ત્યાંના બીજા રાષ્ટ્રવાદીઓએ-પંજાબીઓએ-શીખોએ તેમજ સનાતનીઓએ કેટલું ભોગવવું પડશે એ વિચારીને ધ્રુજી જવાય છે.

વડાપ્રધાન મોદી, પંજાબ, પાકિસ્તાન અને ખાલિસ્તાન

 

 --- 5 જાન્યુઆરી, 2022: એક રાષ્ટ્રવાદીને કાયમ માટે દૂર કરી દેવાની એ ચાલ હતી કે પછી આ તારીખ પંજાબમાં કોંગ્રેસનું આત્મઘાતી પગલું સાબિત થશે? ખાલિસ્તાની ચળવળને કોણ હવા આપી રહ્યું છે? કોણ જીતશે – પંજાબિયત કે વામણા વિપક્ષો?

 

સ્વર્ણિમ ભારત - અલકેશ પટેલ

 

રવિવારે તમે આ લેખ વાંચતા હશો ત્યારે પંજાબની રાજકીય સ્થિતિએ કઈ દિશામાં કરવટ બદલી હશે એનો આજે શુક્રવારે તો કોઈ અંદાજ નથી. હાલની સ્થિતિએ એટલું નિશ્ચિત છે કે, પંજાબની રિમોટ કંટ્રોલ સરકારે હિમાલય જેવડી મોટી ભૂલ કરી દીધી છે. પંજાબના મુખ્યપ્રધાન ચન્નીને આ માટેના દિશા-નિર્દેશ કોના તરફથી, ક્યારે અને કેવી રીતે મળ્યા હતા એ વાત તો કદી બહાર નહીં આવે, પરંતુ એટલું સ્પષ્ટ શબ્દોમાં કહી શકાય કે પાંચ જાન્યુઆરી, 2022ની ઘટનાથી પંજાબ કોંગ્રેસના અંતનો આરંભ થઈ ગયો છે.

આમ તો જે દિવસે નવજોત સિદ્ધુને પંજાબ કોંગ્રેસનો પ્રમુખ બનાવવામાં આવ્યો એ જ દિવસે રાજ્યમાં કોંગ્રેસની ઘોર ખોદાઈ ગઈ હતી, પરંતુ પંજાબ કોંગ્રેસના ઊંટની પીઠ ઉપરનું છેલ્લું તણખલું વડાપ્રધાન નરેન્દ્ર મોદીના જીવને જોખમમાં મૂકવાની ગુસ્તાખી બની રહેશે.

નરેન્દ્ર મોદી નામનું એક રાષ્ટ્રવાદી વ્યક્તિત્વ તમામ સનાતન-વિરોધીઓની આંખમાં કણાની જેમ ખૂંચે છે. આ માણસે કોઈનું પણ અહિત કર્યું નથી. જે કંઈ કર્યું છે તે માત્ર આ દેશના સાચા નાગરિકોને ગૌરવ અપાવવાનું કામ કર્યું છે. દુનિયામાં ભારતીય તરીકેની ઓળખ ગૌરવ બની રહે એવાં કામ નરેન્દ્ર મોદીએ કર્યાં છે. પાકિસ્તાન અને ભારતમાં રહેતા પાકિસ્તાની મળતિયાઓની લાંબાગાળે જમ્મુ-કાશ્મીરને ભારતથી અલગ કરી દેવાની યોજના ધૂળમાં મળી ગઈ એ દિવસથી પાકિસ્તાનના ઝેરીલા જેહાદીઓ અને ભારતમાં વસતા તેમના સ્લીપર સેલ મોદીના લોહીના તરસ્યા થયા છે.

રાષ્ટ્રદ્રોહીઓએ 2018ની પહેલી જાન્યુઆરીએ મહારાષ્ટ્રના ભીમા-કોરેગાંવમાં સભા કરી અને ત્યાં હિંસા થઈ. એ હિંસાખોરોની તપાસ દરમિયાન નરેન્દ્ર મોદીની હત્યા માટે માઓવાદીઓ દ્વારા ઘડવામાં આવેલી રહેલા કાવતરાને લગતો એક પત્ર તપાસ એજન્સીઓના હાથમાં આવ્યો હતો. એ પત્રમાં એક વાક્ય હતું કે, – જે રીતે 1991માં તમિળનાડુમાં એલટીટીઈ દ્વારા રાજીવ ગાંધીની હત્યા કરવામાં આવી હતી એવી જ રીતે નરેન્દ્ર મોદીને તેમના રોડશો દરમિયાન... માઓવાદીઓની આ ટૂલકિટ ઉપર કામ કરવા માટે પાકિસ્તાને ખાલિસ્તાની ચળવળને હવા આપી. એક વર્ષ સુધી ચાલેલા નકલી ખેડૂત આંદોલન દરમિયાન અનેક વખત ઉશ્કેરણી કરવામાં આવી જેથી સરકાર આકરાં પગલાં લે અને પછી આખા દેશમાં હિંસા ફેલાવીને મોદીને બદનામ કરીને સત્તાભ્રષ્ટ કરી શકાય. જોકે, રાષ્ટ્રદ્રોહીઓની ચાલ સારી રીતે સમજી ચૂકેલા નરેન્દ્ર મોદીએ એક પણ ગોળી ચલાવ્યા વિના આંદોલન એક વર્ષ સુધી ચાલવા દીધું અને છેવટે ત્રણ કાયદા ખેડૂતોના હિતમાં હતા છતાં પાછા ખેંચી લીધા. એ કાયદા પાછા ખેંચાવાથી ટુણિયાટ અને વામણા વિપક્ષોનો ગરાસ લૂંટાઈ ગયો છે. કાયદામાં પીછેહઠ છતાં મોદીની સ્થિતિ નબળી ન પડતાં વામણા વિપક્ષે જે ખેલ ખેલવાનું દુઃસાહસ કર્યું તે ગત બુધવારે દેશ અને દુનિયાએ જોયું.

જે કંઈ થયું તેનું સત્ય ગમેત્યારે બહાર આવશે, પરંતુ પંજાબની ચન્ની સરકારનો તેમજ કોંગ્રેસના ગાંધી ખાન-દાનનો બચાવ કરનારા લોકો અને એજન્ડાધારી મીડિયા જે કંઈ કરી રહ્યા છે તે માત્ર ખેદજનક જ નહીં પણ અત્યંત જોખમી છે. આ તત્વો મુખ્યપ્રધાન ચન્નીને દલિત બતાવીને એવી છાપ ઊભી કરવા માગે છે કે મોદી સરકાર દલિતને નિશાન બનાવે છે! ભારતીય નાગરિકોએ વામણા વિપક્ષોની આવી ચાલમાં ફસાવું જોઈએ નહીં. આ સમગ્ર કેસમાં વાત કોઈ દલિત મુખ્યપ્રધાનની નથી, પણ એક ચૂંટાયેલી રાજ્ય સરકારે આ વિશાળ દેશના એક શક્તિશાળી વડાપ્રધાનના સંરક્ષણમાં જે કોઈ ગોબાચારી કરી તેની સામે જો આકરાં પગલાં લેવામાં ન આવે તો વિપક્ષ શાસિત બીજાં રાજ્યોના વામણા નેતાઓને પણ આવી ગુસ્તાખી કરવાની છૂટ મળી જાય.

કેન્દ્રીય ગૃહ મંત્રાલયની ટીમની તપાસનું શું પરિણામ આવશે, સુપ્રીમ કોર્ટમાં આ અસાધારણ ઘટના અંગેનો જે કેસ ચાલી રહ્યો છે એ કઈ દિશામાં જશે – એ બધા પ્રશ્નોના જવાબ આગામી દિવસોમાં મળશે... પરંતુ ખાલિસ્તાની માનસિકતાની આગમાં પાકિસ્તાન દ્વારા, વામણા વિપક્ષો દ્વારા, ભારતમાં બેઠેલા પાકિસ્તાનના મીડિયા સહિતના સ્લીપર સેલ દ્વારા જે પેટ્રોલ નાખવામાં આવી રહ્યું છે તે ભારતને અને રાષ્ટ્રવાદી ભારતીયોને તો દઝાડશે જ પણ એ આગની જ્વાળાથી એ લગાડનારા પોતે પણ નહીં જ બચી શકે એ એટલું જ નિશ્ચિત છે.

અકાલી દળ અને ભાજપના સંયુક્ત શાસન દરમિયાન જે પંજાબ શાંત અને સુખી હતું એ પંજાબને કોંગ્રેસે, ખાસ કરીને પાકિસ્તાની તરફી માનસિકતા ધરાવતા સિદ્ધુ જેવા તત્વોએ ફરી અશાંતિ તરફ ધકેલી દીધું છે. સિદ્ધુની સાથે બધા નહીં પણ મુઠ્ઠીભર કોંગ્રેસીઓ છે, મુઠ્ઠીભર મીડિયા છે અને આખું પાકિસ્તાન, ચીન તેમજ ભારતમાં વસતા ઝેરીલા માઓવાદીઓ અને અર્બન નક્સલવાદીઓ સિદ્ધુની સાથે છે. આ બધા ભેગા મળીને ખાલિસ્તાનીઓને પ્રોત્સાહન આપી રહ્યા છે. કેન્દ્ર સરકાર આ વાત સારી રીતે જાણતી-સમજતી જ હશે. ભાજપ અને અન્ય રાષ્ટ્રવાદીઓ હંમેશાં સહિષ્ણુતામાં માનતા હોય છે અને તેથી લોકશાહી પદ્ધતિએ ચૂંટણી દ્વારા પંજાબમાં જીત મેળવીને ત્યાં ફરી શાંતિ સ્થાપવાની ગણતરી હશે...પરંતુ પાંચ જાન્યુઆરી, 2022ની ઘટના પછી આવી કોઈ સહિષ્ણુતા રાખવાનું માત્ર ભાજપને જ નહીં, સમગ્ર દેશને મોંઘું પડી શકે છે. એ દિશામાં કેન્દ્રીય નેતૃત્વ વિચાર કરે ત્યાં સુધી... મિલતે હૈ બ્રેક કે બાદ!