ઑપરેશન ‘આતંકી જૈશ’ થી ‘વીર અભિનંદન’

ઑપરેશન ‘આતંકી જૈશ’ થી ‘વીર અભિનંદન’

--- CRPF ઉપરનો હુમલો આતંકીઓને ભારે પડશે એવું મક્કમ નિવેદન વડાપ્રધાન મોદીએ સાબિત કરી બતાવ્યું. આતંકી ક્ષેત્રો ઉપર હુમલો કર્યો, એટલું જ નહીં પરંતુ પછીની કાર્યવાહી દરમિયાન પાકિસ્તાન પહોંચી ગયેલા વિંગ કમાન્ડર અભિનંદનને અઢી દિવસમાં પરત લાવી શકાયો... આ નવું ભારત છે #IndiaFirst

-- અલકેશ પટેલ

આ નવું ભારત છે. ભારત ઘણું બદલાયું છે. છેલ્લા પાંચ વર્ષમાં આ દેશને જાણે એક નવી ઓળખ મળી છે. રાષ્ટ્રવાદ અને ધર્મ વિશે જાગ્રતિ વધી છે. કદાચ એટલે જ ગત 14 ફેબ્રુઆરીના આતંકવાદી હુમલા પછી જે કોઈ ઘટનાક્રમ બની રહ્યો છે તેમાં 97 ટકા લોકો સરકારના દરેક પગલામાં સાથ આપે છે. મને ખ્યાલ છે કે તમારા બધાના મનમાં તરત સવાલ થશે, 97 ટકા કેમ અને બાકીના ત્રણ ટકા કોણ? બાકીના ત્રણ ટકામાં ડાબેરીઓના રવાડે ચડેલી નક્સલવાદી માનસિકતા ધરાવતી ટુકડે ગેંગ, ઉપરાંત મુઠ્ઠીભર જેહાદી મુસ્લિમો, ઉપરાંત મુઠ્ઠીભર નાસમજ વિરોધપક્ષો, ઉપરાંત મુઠ્ઠીભર સાવ રબ્બીશ મીડિયાવાળાનો સમાવેશ થાય. આ ત્રણ ટકાની કિમત અને હેસિયત આમ તો સાડાત્રણ ટકા જેટલી જ છે, છતાં એ છે એવું આપણે ઉદારપણે સ્વીકારવું જોઇએ.

ખેર, તો મુળ વાત એ છે કે, દેશ અનિર્ણાયકતા, મીટિંગ-ઇટિંગ અને ચીટિંગ, સમિતિઓની રચના અને અહેવાલો, એ અહેવાલોની સમીક્ષા માટે બીજી સમિતિઓની રચના અને તેમના અહેવાલો... આ બધામાંથી સદનસીબે સાડા ચાર વર્ષથી બહાર આવી ગયો છે. આપણા સંરક્ષણ દળો પહેલેથી ખૂબ બાહોશ હતાં, પરંતુ તેમના પગ બાંધી રાખવામાં આવેલા હતા. તેમને પૂરતાં શસ્ત્રો અને યુદ્ધ વિમાનો પણ આપવામાં આવતાં નહોતાં. દેશમાં છેક 1990ના દાયકામાં મિગ યુદ્ધ વિમાન ખરીદવામાં આવ્યાં હતાં, પછી છેલ્લા 28 વર્ષથી એકપણ નવું, આધુનિક યુદ્ધ વિમાન ખરીદવામાં આવ્યું નહોતું. આ ગાળામાં મોટેભાગે કયા પક્ષ અથવા કયા ગઠબંધનોનું શાસન હતું એ કહેવાની જરૂર ખરી..!? મોદી સરકારે નવા અત્યાધુનિક રાફેલ વિમાન માટે સોદો કરેલો છે જે આપણને આગામી સપ્ટેમ્બરથી મળવાના શરૂ થશે.

આવી સ્થિતિ છતાં, આપણા સંરક્ષણ દળો કેટલા સક્ષમ છે એ આપણે સૌએ 26 ફેબ્રુઆરીને મંગળવારે જોઈ લીધું. હવાઈ દળના 12 યુદ્ધ વિમાનોએ અડધી રાત્રે છેક પાકિસ્તાનમાં જઈને ત્યાં સક્રિય આતંકવાદીઓની છાવણીઓનો ખાત્મો બોલાવી દીધો. એ આઘાત અને એ અપમાન સહન ન થતાં ના-પાકિસ્તાને બીજા દિવસે જમ્મુ-કાશ્મીરમાં ભારતના લશ્કરી મથકો ઉપર હુમલા કરવાનો પ્રયાસ કર્યો, પણ હંમેશની જેમ પાકિસ્તાનીઓનો પનો ટૂંકો પડ્યો અને ભારતને કશું નુકસાન કરી શક્યા નહીં. પરંતુ એ દરમિયાન ભારતીય હવાઈદળના બાહોશ જવાન વિંગ કમાન્ડર અભિનંદન વર્ધમાને ત્રણ દાયકા જૂના મિગ વિમાન દ્વારા પાકિસ્તાનીઓનો પીછો કરીને તેમને તગેડી મૂક્યા. એ દરમિયાન છોડેલી મિસાઇલનો ઝાટકો મિગ વિમાન સહન કરી શકતાં તે હવામાં ફંગોળાવા લાગ્યું અને તેથી પોતાનો જીવ બચાવવા કૂદી ગયેલા વિંગ કમાન્ડર અભિનંદન વર્ધમાન પેરાશૂટ સાથે પાકિસ્તાનની સરહદમાં ઉતર્યા.

મેલાં મનના પાકિસ્તાનીઓનો ઇરાદો વિંગ કમાન્ડર અભિનંદનના બદલામાં સોદો કરવાનો હતો, પરંતુ ભારતીય સરકાર તથા ભારતીય સૈન્ય અને ભારતીય પ્રજાની મક્કમતા ઉપરાંત આંતરરાષ્ટ્રીય દબાણ સામે ના-પાકીઓએ ઝૂકી જવું પડ્યું.

પ્રારંભમાં કહ્યું તેમ, આ સમગ્ર ઘટનાક્રમમાં ભારત સરકારની મક્કમતા અને કૂટનીતિનો ઘણો મોટો ફાળો છે અને હકીકતે તેનો જ વિજય છે. બાકી, આપણાં લશ્કરી દળો સાત દાયકાથી આ જ હતાં, આપણું વહીવટીતંત્ર સાત દાયકાથી આ જ હતું પણ અનિર્ણાયક સરકારોને કારણે બધું બંધિયાર થઈ ગયેલું હતું. સપ્ટેમ્બર, 2016માં ઉરીમાં ભારતીય લશ્કરી છાવણી ઉપર આતંકવાદી હુમલા પછી 15 દિવસમાં જ પાકિસ્તાને પચાવી પાડેલા જમ્મુ-કાશ્મીરમાં સર્જિકલ સ્ટ્રાઇક કરીને ભારતીય લશ્કરી જવાનોએ અનેક આતંકીઓનો ઠાર મારી દીધા હતા એટલું જ નહીં પરંતુ એમની કમર તોડી નાખી હતી. ગયા મહિને પણ 12 દિવસના ગાળામાં જ છેક પાકિસ્તાનની અંદર પહોંચીને પ્રચંડ હુમલો કરીને ભારતીય લશ્કર અને ભારતીય સરકારે એટલું તો સાબિત કરી દીધું છે કે આ દેશ અને અહીંની સરકાર હવે નબળી અને નમાલી નથી.

બસ હવે આ દેશ ઉપર જો કોઈ વધારે જોખમ હોય તો તે ઉપર કહ્યા એ ત્રણ ટકા લોકોનું છે. આ ત્રણ ટકા દેશ વિરોધી તત્વો છે એ વાતનો હિંમતભેર અને મક્કમપણે સ્વીકાર કરવો પડશે. જો એવો સ્વીકાર થશે તો જ એ ડાબેરી તેમજ જેહાદી ટોળકીઓનો ખાત્મો બોલાવી શકાશે. જ્યાં સુધી આ બંને ટોળકી સક્રિય હશે ત્યાં સુધી દેશ ઉપરથી જોખમ ટળશે નહીં એ પણ એટલું જ નિશ્ચિત છે, કેમ કે આ ટોળકીઓ સરહદપારના જેહાદીઓના ઇશારે અને તેમના માટે કામ કરે છે. તેથી જ દેશની અંદર રહેલા આવા તત્વોને ઓળખવા અને તેમને હરાવવા પણ એટલું જ અગત્યનું છે.

રાફેલ વિવાદઃ કોને તારશે? કોને ડુબાડશે?

રાફેલ વિવાદઃ કોને તારશે? કોને ડુબાડશે?

--- દક્ષિણ ભારતના એક અંગ્રેજી અખબારે યુદ્ધ વિમાન રાફેલ સોદાની વાટાઘાટ અંગે તે સમયના સંરક્ષણ સચિવે કરેલી નોંધ પ્રકાશિત કરીને શાંત પડી રહેલા આ વિવાદનો મધપૂડો ફરી છંછેડ્યો છે. હવે આ વિવાદનો ડંખ કોને વાગશે?

-- અલકેશ પટેલ

ફરી એક વખત રાફેલ યુદ્ધ વિમાન વિવાદમાં છે. ફરી એક વખત ઉદ્યોગપતિ અનિલ અંબાણીના ખભે બંદૂક રાખીને નરેન્દ્ર મોદી ઉપર નિશાન તાકવામાં આવી રહ્યું છે. અને આ વખતે સમગ્ર ખેલમાં દક્ષિણ ભારતના એક અખબારનો ઉપયોગ થઈ રહ્યો છે...અથવા કહો કે દક્ષિણ ભારતનું એક અખબાર વાંકું વળીને પોતાની પીઠનો ઉપયોગ કરવા દઈ રહ્યું છે જેથી વિપક્ષો એ પીઠ ઉપર કૂદીને આક્ષેપબાજી કરી શકે. આ અખબારનું નામ છે તો હિન્દુ, પરંતુ હિન્દુત્વ અને ભારતીય સંસ્કૃતિ સાથે તેને કેટલું વેર છે એ બાબત જાણકારો સારી રીતે જાણે છે.

ગત આઠ (8) ફેબ્રુઆરીને શુક્રવારે એ અંગ્રેજી અખબારે એક અહેવાલ પ્રકાશિત કરીને થોડા કલાક માટે આખા દેશમાં વિવાદનો વંટોળ જગાવી દીધો. રાફેલ સોદા અંગે 2016માં જે વાતચીત ચાલી રહી હતી તે સમયે સંરક્ષણ ખાતાના એક સચિવને વડાપ્રધાન કાર્યાલયના અધિકારીઓ એ વાટાઘાટમાં સામેલ થાય એ ગમ્યું નહોતું અને તેમણે એ બાબતે વાટાઘાટો માટેની જે ફાઇલ હોય તેના ઉપર પોતાની નારાજગી દર્શાવતી નોંધ લખી હતી. આ નોંધને આધારે અંગ્રેજી અખબારે એવો દાવો કરી દીધો કે વડાપ્રધાન કાર્યાલયની “દખલગીરી” ને કારણે રાફેલ સોદો મોંઘો પડ્યો, એટલું જ નહીં પરંતુ આ બધું અનિલ અંબાણીના લાભ માટે કરવામાં આવ્યું હતું..!

ખેર, એ અખબારી સ્વતંત્રતાનો મુદ્દો છે. કયું અખબાર કે મીડિયા ગૃહ કઈ વિચારધારા ધરાવતું હોય છે, તેનો એજન્ડા શું હોય છે- એ બધી અંગત બાબત છે. પરંતુ રાષ્ટ્રહિતની વાત આવે ત્યારે કોઈ વિચારધારા અને એજન્ડા અંગત ન હોઈ શકે. દેશના સંરક્ષણ દળોની વાત આવે ત્યારે કોઈ વિચારધારા કે એજન્ડા અંગત ન હોઈ શકે. જોકે, કમનસીબે 2014થી આપણો કમનસીબ દેશ - રાજકીય પક્ષોની સાથે સાથે મીડિયાના એક વર્ગ દ્વારા પણ રાષ્ટ્રહિતના વિરોધમાં, સુરક્ષા દળોના વિરોધમાં, હિન્દુત્વ અને સનાતન સંસ્કૃતિના વિરોધમાં અતિશય ઝેરી અપપ્રચારનો અનુભવ કરી રહ્યો છે.

પરંતુ હંમેશાં કહેવાય છે એમ, અસત્યને પગ નથી હોતા અને સત્ય ઢંકાયેલું રહેતું નથી. સત્ય હેરાન થઈ શકે છે. સત્યને મુશ્કેલી પડી શકે છે, પરંતુ સત્ય હારતું નથી. અને એટલે જ શુક્રવારે સવારે દક્ષિણ ભારતના અંગ્રેજી અખબારમાં ભારત સરકારને બદનામ કરીને ભારતીય હવાઈદળનું નૈતિક મનોબળ તોડી નાખવાનો જે હિચકારો પ્રયાસ થયો તેનો રદિયો સાંજ પડતા સુધીમાં ભારતીય હવાઈદળના નિવૃત્ત ઍર માર્શલ એસ.બી.પી. સિંહાએ આપ્યો. ઍર માર્શલ સિંહા પોતે રાફેલ ખરીદવા માટેની વાટાઘાટ સમિતિના ચૅરમેન હતા.

ઍર માર્શલ સિંહાએ જાતે એક ટીવી ચૅનલ ઉપર સ્પષ્ટ શબ્દોમાં જણાવ્યું કે અંગ્રેજી અખબારે સંરક્ષણ વિભાગના જે સચિવની નોંધ સાથેનો અહેવાલ પ્રકાશિત કર્યો છે એ શર્મા નામના સચિવ રાફેલ માટેની વાટાઘાટ સમિતિમાં સામેલ જ નહોતા. શર્મા સંરક્ષણ મંત્રાલયમાં કામ કરતા હતા ખરા, પરંતુ રાફેલ વાતચીતમાં તેમની કોઈ ભૂમિકા નહોતી. તેઓ અન્ય સંરક્ષણ સોદાઓ માટેની સમિતિમાં સંકળાયેલા હતા, રાફેલમાં નહીં.

હવે સવાલ એ ઉપસ્થિત થાય છે કે, વાટાઘાટ કરનારી સમિતિના વડા પોતે જાહેરમાં આવીને સ્પષ્ટતા કરે છે ઉપજાવી કાઢેલો અહેવાલ પ્રકાશિત કરનાર અખબારની વિશ્વસનિયતા કેટલી? અને એ ઉપજાવી કાઢેલા અહેવાલને આધારે પત્રકાર પરિષદ યોજીને નરેન્દ્ર મોદી અને અનિલ અંબાણી ઉપર આક્ષેપબાજી કરનાર કોંગ્રેસ અધ્યક્ષ રાહુલ ગાંધીની વિશ્વસનિયતા કેટલી?

રાજકારણ, રાજકીય આક્ષેપબાજી, ચૂંટણી...એ બધું જ તેના સ્થાને છે- પરંતુ વડાપ્રધાન સામે બદલો લેવાના આશયથી, કોઈ ઉદ્યોગગૃહ (રિલાયન્સ) સામે બદલો લેવાના આશયથી રાહુલ ગાંધી પોતે કોઈ અખબારની પીઠ ઉપર ચઢીને દેશની પ્રતિષ્ઠાને નુકસાન થાય, સંરક્ષણ દળોનું મનોબળ તૂટે એ પ્રકારની વાતો કરતા હોય ત્યારે સમજદાર નાગરિકોને ખ્યાલ આવવો જોઇએ કે કોંગ્રેસની દાનતમાં ક્યાંક ખોટ છે. આ તબક્કે નાગરિકોએ એટલું યાદ રાખવું જોઇએ કે, 1) નેશનલ હેરાલ્ડ કૌભાંડમાં સોનિયા ગાંધી અને રાહુલ ગાંધી જામીન ઉપર છે. 2) જમીન કૌભાંડ તેમજ લંડનમાં બેનામી મિલકતોના કેસમાં સોનિયા ગાંધીના જમાઈ અને રાહુલ ગાંધીના બનેવી રૉબર્ટ વાડ્રા (આગોતરા) જામીન ઉપર છે. 3) ભૂતપૂર્વ કેન્દ્રીય ગૃહ અને નાણા પ્રધાન પી. ચિદમ્બરમ્ (કોંગ્રેસ), તેમનાં પત્ની નલિની ચિદમ્બરમ્, તેમના પુત્ર કાર્તિ ચિદમ્બરમ્ – એ ત્રણે ભ્રષ્ટાચાર તેમજ અમર્યાદ સંપત્તિના કેસોમાં જામીન ઉપર છે. 4) કોંગ્રેસ શાસન વખતના વધુ એક કૌભાંડ ઑગસ્ટા વેસ્ટલેન્ડ કેસનો દલાલ ક્રિશ્ચન મિશેલ ભારતની જેલમાં છે. 5) પશ્ચિમ બંગાળમાં અંદાજે 20,000 કરોડ રૂપિયાના શારદા ચીટફંડ કૌભાંડમાં મમતા બેનરજીના ભત્રીજા ઉપરાંત પશ્ચિમ બંગાળ સરકારના કેટલાક પ્રધાનો તેમજ પક્ષના નેતાઓ અને ટીએમસીના ત્રણ સાંસદો સામે કેસ નોંધાયેલા છે.

રાફેલ: મીડિયા ઉલ્લુ બની શકે, અદાલત અને પ્રજા નહીં

રાફેલ: મીડિયા ઉલ્લુ બની શકે, અદાલત અને પ્રજા નહીં

--- નહેરુના સમયના જીપ કૌભાંડથી માંડીને મનમોહનસિંહના સમયના કોલસા-હેલિકૉપ્ટર-કૉમનવેલ્થ-ટેલિકોમના સાબિત થઈ ચૂકેલા કૌભાંડોથી ખરડાયેલી કોંગ્રેસે પીએમ મોદી ઉપર કાદવ ઉછાળ્યો, પણ એ કાદવ છેવટે કોંગ્રેસના મોં ઉપર જ આવીને પડ્યો  

-- અલકેશ પટેલ

લેખનું હેડિંગ તમે સાચું જ વાંચ્યું છે, કોઈ ભૂલ નથી. રાફેલ મુદ્દે મીડિયા ઉલ્લુ બની શકે, અદાલત અને પ્રજા નહીં. ભાજપના કહેવાતા શુભેચ્છકો અને કહેવાતા રાજકીય સમીક્ષકો તમને ગયા મંગળવાર સાંજથી એવું જ કહેતા હશે કે રાહુલબાબાએ રાફેલ મુદ્દે પ્રચાર કર્યો એટલે ત્રણ રાજ્યમાં ભાજપની હાર થઈ!! આવું માનનારા અને કહેનારા માટે એક સરસ કહેવત છે – કહેતા ભી દિવાના, સુનતા ભી દિવાના..!!!

ખેર, આખી વાતનો સાર એ છે કે, વાસ્તવમાં અદાલત અને પ્રજાને જેમ આવા મુદ્દે ઉલ્લુ ન બનાવી શકાય તેવી જ રીતે મીડિયા પણ કંઈ હકીકતમાં ઉલ્લુ નથી, પણ બદમાશ છે. શું આ બદમાશ અને ભ્રષ્ટ મીડિયાને ખબર નથી કે ગુજરાતમાં 14 વર્ષ સુધી અને કેન્દ્રમાં છેલ્લા સાડાચાર વર્ષથી – એમ કુલ 18 વર્ષ કરતાં વધુ સમયથી શાસન કરનાર નરેન્દ્ર મોદીનો પગ ભ્રષ્ટાચાર અને ગેરરીતિના કુંડાળામાં પડ્યો નથી? અને પડી શકે એમ પણ નથી? સાચી વાત એ છે કે, કેટલાય દાયકાઓથી કોંગ્રેસ અને મીડિયાને “એકબીજાને સાચવી લેવાનું” ફાવી ગયું હતું, પરંતુ 2002થી ગુજરાતમાં અને 2014થી દિલ્હીમાં “આ સાચવી લેવાનો વહેવાર” વેરવિખેર થઈ ગયો અને મોદી વેરી થઈ ગયા છે.

રાફેલ સોદામાં વારંવાર સ્પષ્ટતા કરવામાં આવી કે (1) આ કરાર બે સરકાર વચ્ચે થયો છે, (2) આ કરારમાં કોઈ મધ્યસ્થી કે દલાલ નથી, (3) આ કરાર ભારત સરકારે કોઈ કંપનીને સીધેસીધો આપ્યો નથી, (4) આ કરાર હેઠળ ફ્રાન્સની સરકારે દસોલ્ત કંપનીને કોન્ટ્રેક્ટ આપ્યો છે, (5) કરારની શરતો મુજબ દસોલ્ત કંપની જે કંઈ નફો કરે તેના અમુક ટકા રકમનું ભારતમાં પુનઃ રોકાણ કરવું પડે, (6) આ પુનઃ રોકાણ માટે ભારતની કઈ કંપનીઓ સાથે કોન્ટ્રેક્ટ કરવા એ નક્કી કરવા દસોલ્ત સ્વતંત્ર છે, (7) દસોલ્તે આ માટે ભારતની લગભગ 100 કંપની સાથે કોન્ટ્રેક્ટ કર્યા છે અને તેમાંની એક અનિલ અંબાણીની રિલાયન્સ છે, (8) દસોલ્ત જે કુલ 30,000 કરોડનું મૂડી રોકાણ ભારતમાં કરશે તેમાંથી રિલાયન્સનો હિસ્સો માત્ર ત્રણ (3) ટકા જ છે, (9) કોંગ્રેસ-યુપીએના સમયમાં રાફેલ માટે વર્ષો સુધી “માત્ર વાતચીત ચાલ્યા કરી હતી”, સોદો થયો નહોતો... આટલા બધા મુદ્દે પહેલા દિવસથી સ્પષ્ટતાઓ હતી છતાં રાહુલબાબા ચોરે ને ચૌટે એ વિશે બોલતા રહ્યા અને સાવ જૂજ મીડિયાએ બાબાને હકીકતનો અરીસો બતાવવાનો પ્રયાસ કર્યો, પરંતુ બાકીના મોટાભાગના મીડિયા બદમાશી કરતા રહ્યા, કદાચ હજુ પણ બદમાશી ચાલુ રાખશે..!?

વિવાદ પાછળનો ખતરનાક ખેલઃ બાબા દ્વારા હજુ આજે પણ આ વિવાદ ચગાવવામાં આવી રહ્યો છે અને બાબાનાં બાળોતિયાં ધોવામાં અલૌકિક આનંદની અનુભૂતિ કરનાર મીડિયા પણ હજુ તેને ચગાવે છે...તો તેની પાછળ કંઇક તો કારણ હશે ને! હા, છે જ. કારણ છે (1) નેશનલ હેરલ્ડ કેસ. અંદાજે 5000 કરોડના આ કૌભાંડમાં રાહુલ અને સોનિયા ગાંધી સામે કેસ ચાલે છે અને બંને જમાનત ઉપર છે. (યાદ રહે, સુબ્રમણ્યમ સ્વામીએ નક્કર પુરાવા સાથે આ કેસ કરેલો છે અને એટલે જ હજુ પણ કેસ ચાલુ છે. જો કેસમાં દમ ન હોત તો ક્યારનો રાફેલની જેમ કોર્ટે ફગાવી દીધો હોત) (2) કોંગ્રેસના નેતાઓ સામે બીજો ગંભીર કેસ અગુસ્તા-વેસ્ટલેન્ડ હેલિકૉપ્ટર કૌભાંડનો પણ ચાલે છે. (યાદ રહે, આ કેસમાં લાંચ ચૂકવાઈ હોવાનું સાબિત થતાં ઇટાલીના શસ્ત્ર દલાલોને ઇટાલીની કોર્ટે જેલની સજા ફટકારી દીધેલી છે. ઉપરાંત એ સોદાનો મુખ્ય દલાલ જેણે કોંગ્રેસી નેતાઓ તેમજ ભારતીય હવાઈદળના કેટલાક અધિકારીઓને લાંચ આપી હોવાની વાત છે એ ક્રિશ્ચન મિશેલ હાલ સીબીઆઈની કસ્ટડીમાં છે.) (3) વિજય માલ્યા, નિરવ મોદી, મેહુલ ચોક્સી વગેરે દેશ છોડી ભાગી ગયા એ બદલ રાહુલબાબા ભલે નરેન્દ્ર મોદી સરકારને સવાલ કરતા હોય, પરંતુ અનેક કોંગ્રેસી નેતાઓ ઉપરાંત બદમાશ મીડિયા ટોળકી જાણે જ છે કે આ બધાને બેંકની લોન કંઈ મોદી સરકારના વખતમાં આપવામાં નહોતી આવી, એ બધી જ લોન કોંગ્રેસ-યુપીએના વખતમાં આપવામાં આવેલી હતી અને મોદી સરકારે એ પરત લેવાની પ્રક્રિયા શરૂ કરી એટલે એ બધા દેશ છોડીને ભાગી ગયા છે. (4) કોંગ્રેસના સૌથી વરિષ્ઠ નેતાઓ પૈકી એક ભૂતપૂર્વ ગૃહપ્રધાન પી. ચિદમ્બરમ્ અને તેમનો આખો પરિવાર ઘણા મોટા આર્થિક ગોટાળામાં સંડોવાયેલો છે. મળતિયાઓને ટીવી ચેનલોના લાઇસન્સ અપાવવામાં ચિદમ્બરમના પુત્ર કાર્તિ ચિદમ્બરમે જે “ભૂમિકા ભજવી” તે બદલ તેને જે કટકી મળી તેની ગોઠવણ કરવા તેણે દુનિયાના કેટલાય દેશોમાં બેંકખાતાં ખોલ્યા હતા અને એ નાણાં ગેરકાયદે રીતે ભારતમાં લાવવા માગતો હતો. આ કૌભાંડનો કેસ સજ્જડ રીતે ચાલી રહ્યો છે.

સ્વાભાવિક છે રાહુલબાબાને આ બધા કેસોની ચિંતા હોય અને તો પછી એ સંજોગોમાં શું કરવું? એટલે એમને રાફેલનું પૂછડૂં હાથમાં આવી ગયું. દેશના સમજદાર નાગરિકોને સવાલ થઈ રહ્યો છે કે, લગભગ બે દાયકાથી જાહેરજીવનમાં હોવા છતાં જે મોદીનો પગ ભ્રષ્ટાચારના કુંડાળામાં પડ્યો નથી, દેશના અનેક રાજ્યોમાં ભાજપની સરકારો હોવા છતાં ત્યાં ભ્રષ્ટાચારના કોઈ દેખીતા કેસ સામે આવ્યા નથી... અને છતાં જ્યારે આ બાબા આટલી બધી બૂમો પાડે છે અને તેમાં બાબાના ઝભ્ભાના ખિસ્સામાં ભરાયેલા મીડિયાવાળા પણ સાથ આપે છે તેનો અર્થ તો એવો થાય કે કોંગ્રેસ અને તેના આશ્રિત મીડિયાની દાળમાં જ કંઈક કાળુ છે..!?

ક્રિશ્ચન મિશેલઃ બિઝનેસમાં બ્રાઇબ ઘૂસાડી અને ફસાયા

ક્રિશ્ચન મિશેલઃ બિઝનેસમાં બ્રાઇબ ઘૂસાડી અને ફસાયા

--- કોઇપણ પ્રકારનો કાનૂની બિઝનેસ કરવો એમાં કશું ખોટું નથી અને એ રીતે દલાલી પણ એક બિઝનેસ છે, પરંતુ એ દલાલી અનૈતિક બની જાય અને તેમાં લાંચનું તત્વ ઘૂસી જાય તો મિશેલ તો ડૂબે જ, સાથે બીજા પણ ઘણા ડૂબે!

--- અલકેશ પટેલ

       

ગ્લોબલ સર્વિસિસ - એફઝેડઈ, દુબઈ, આઈડીએસ, ટ્યુનિશિયા, આઈડીએસ, મોરિસસ તથા એરોમેટ્રિક્સ... આ બધા શેના નામો છે જાણો છો? અગુસ્તાવેસ્ટલેન્ડ વીવીઆઈપી હેલિકૉપ્ટર કૌભાંડ કેસમાં ઝડપાયેલા દલાલ ક્રિશ્ચન મિશેલ અને તેના સાથીદારો દ્વારા સ્થાપવામાં આવેલી બેનામી કંપનીઓના આ નામો છે. આ બેનામી કંપનીઓની સ્થાપના હેલિકૉપ્ટરનો કોન્ટ્રેક્ટ મેળવવા માટે લાંચના નાણાં ભારતમાં લાવવા અને પછી એ નાણાં “લાભાર્થીઓ” સુધી પહોંચાડવા માટે કરવામાં આવી હતી. અત્યાર સુધીમાં આવા જે સંભવિત “લાભાર્થીઓ” વિશે માહિતી મળી છે તેમાં ભારતીય એરફોર્સના ભૂતપૂર્વ વડા એસ.પી. ત્યાગી તથા તેમના કેટલાક નજીકના સગાનો સમાવેશ થાય છે અને જે “સંભવિત લાભાર્થીઓ” ના નામ ગમેત્યારે ખૂલવાની શક્યતા છે તેમાં સંભવતઃ કોંગ્રેસના નેતાઓ તેમજ વહીવટીતંત્રના અન્ય અધિકારીઓ હોઈ શકે છે. પરંતુ ખેર, આજે અહીં મુદ્દો એ નથી, આજે તો મુદ્દો છે ક્રિશ્ચન મિશેલ. કોણ છે આ વ્યક્તિ? ભારતમાં કૌભાંડના કેસમાં આ ફિરંગી ક્યાંથી આવી ગયો?

ક્રિશ્ચન મિશેલ મૂળે બ્રિટિશ નાગરિક છે અને તેમનું કામ શસ્ત્ર કંપનીઓ માટે કન્સલટન્સી કરવાનું છે. કન્સલટન્સીનો દેશી અર્થ દલાલી થાય, જેમાં વેચનાર અને ખરીદાર વચ્ચે મેળાપ કરાવી આપવાનો અને સોદો પાર પાડવાનો. કન્સલટન્સી અર્થાત દલાલીનો આ બિઝનેસ સદીઓ જૂનો છે અને લાખો લોકો એ કરે છે. ખુદ મિશેલના પિતા વોલ્ગેન્ગ મિશેલે પણ આ જ કામ કર્યું છે. ક્રિશ્ચન પણ પિતા વોલ્ગેન્ગના પરંપરાગત વ્યવસાયમાં જોડાયા અને દાયકાઓ સુધી આ કામ કર્યું, પરંતુ ભારતીય રાજકારણીઓ અને ભારતીય અધિકારીઓ સાથે સોદો કરવામાં તે સપડાયા.

રૂ. 3600 કરોડમાં નક્કી થયેલો અને છેવટે પડતો મૂકાયેલો વીવીઆઈપી હેલિકૉપ્ટરનો આ કેસ આમ ઘણો જૂનો છે, પરંતુ 2004માં કોંગ્રેસના નેતૃત્વ હેઠળ યુપીએની સરકાર બની પછી એ દિશામાં કામગીરી ઝડપી બની અને તે ખરીદવાની પ્રક્રિયા પણ ઝડપી બનાવવામાં આવી જેથી ટોચના રાજકારણીઓ તેમાં ઉડ્ડયનનો આનંદ માણી શકે.

કોંગ્રેસના નેતૃત્વની આ ઉતાવળ ક્રિશ્ચન મિશેલ પારખી ગયા અને તેમણે મૂળ ઇટાલિયન કંપની ફિનમૅકનિકા (જે હવે લિઓનાર્દો તરીકે ઓળખાય છે) તેની બ્રિટિશ શાખા અગુસ્તાવેસ્ટલેન્ડ પાસેથી અત્યાધુનિક અને વૈભવી હેલિકૉપ્ટર ખરીદવામાં મદદ કરવાની દરખાસ્ત કરી. અને પછી એ દરખાસ્તની સાથે જે કંઈ થયું હશે તેના વિશે કોઈ ખુલાસા કરવાની જરૂર ખરી? પણ તેની ગંધ ઇટાલીને આવી ગઈ અને મિલાનની પોલીસે મિશેલના અન્ય સાથીદાર ગ્વીડો હેશકેને ઝડપી લીધો. આ ઘટના છેક 2012ની છે. ભારતમાં હજુ લોકસભા ચૂંટણી આડે બે વર્ષ બાકી હતા. ઇટાલીની પોલીસે એકઠા કરેલા ભ્રષ્ટાચાર અને લાંચના પુરાવાના આધારે ત્યાંની અદાલતે જેટલા લોકો સંડોવાયેલા હતા તેમની સામે ચુકાદો પણ આપી દીધો. આ સોદામાં લાંચ ચૂકવાઈ છે એવું ત્યાંની અદાલતને પ્રથમ દ્રષ્ટિએ લાગ્યું અને એટલે ઇટાલીની શસ્ત્ર કંપનીના કેટલાક અધિકારીઓને કસૂરવાર ઠેરવ્યા.

હવે મામલો ભારત પાસે હતો. સોદો ભારતને લગતો હતો. સોદો કરાવનાર બ્રિટિશ નાગરિક ક્રિશ્ચન મિશેલ હતા. આ સોદામાં મિશેલે અગુસ્તાવેસ્ટલેન્ડ પાસેથી એક 42 મિલિયન યુરો (આશરે રૂ. 337 કરોડ) અને બીજો 28 મિલિયન યુરો (આશરે રૂ. 225 કરોડ)ના બે ગુપ્ત સોદા કર્યા. ભારતીય તેમજ ઇટાલીની તપાસ એજન્સીઓનું તારણ એવું છે કે મિશેલે આ બંને ગુપ્ત સોદા ભારતમાં એરફોર્સના અધિકારીઓ, વહીવટી અધિકારીઓ તેમજ રાજકારણીઓને રકમ ચૂકવવા માટે કર્યા હતા. મિશેલ આ રકમ સીધે સીધી ભારત લાવ્યો નહોતો. સૌથી પ્રારંભમાં જે કંપનીઓના નામ આપ્યા એવી કંપનીઓ તેણે તેમજ તેના અન્ય મળતિયાઓએ બ્રિટન, ટ્યુનિશિયા, મોરિસસ અને દુબઈ એમ અલગ અલગ દેશોમાં બનાવી અને તેમાં નાણાકીય હેરાફેરી કરીને એ નાણાં ભારતમાં લાવવામાં આવ્યા જેમાંથી લાંચ ચૂકવાઈ.

મિશેલ મૂળ બ્રિટિશ નાગરિક અને ત્યાં જ રહીને પોતાનો બિઝનેસ કરતા હતા પરંતુ ઇટાલીની કોર્ટે ભ્રષ્ટાચારની કાર્યવાહી શરૂ કરી પછી તેમને બ્રિટનમાં રહેવાનું સલામત ન લાગ્યું એટલે દુબઈ પહોંચી ગયા. મિશેલ એવા ભ્રમમાં રહ્યા કે યુએઈમાં તેમનો કોઈ વાળ વાંકો નહીં કરી શકે. તેને એવું લાગે એ માટે કારણ પણ છે, કે દુનિયાના અને ખાસ કરીને ભારતના ઘણા અપરાધીઓ ત્યાં જઈને વસી ગયા છે. ત્યાં તેમની ધરપકડ થઈ ગઈ. આ ધરપકડ વિશે બે અલગ અલગ થીયરી ચાલે છે. મિશેલનો પોતાનો દાવો એવો છે કે ભારત સરકારે યુએઈના શાસક ઉપર અંગત સંબંધોનું દબાણ લાવીને તેની ધરપકડ કરાવી. પણ ભારત સરકારના સૂત્રોનું કહેવું છે કે યુએઈમાં મિશેલની ધરપકડમાં ભારતનો કોઈ હાથ નથી. બસ તેની ધરપકડ થયા પછી પ્રત્યાર્પણ કરીને અહીં લાવવા માટે જ સીબીઆઈ સક્રિય થઈ હતી. નરેન્દ્ર મોદી સરકારે રાજદ્વારી પગલાં લેવા ઉપરાંત વડાપ્રધાન મોદીએ અંગત કૂટનીતિક સંબંધોનો ઉપયોગ કરીને મિશેલનું પ્રત્યાર્પણ કરાવી દીધું.

મિશેલ સીબીઆઈની કસ્ટડીમાં છે. સીબીઆઈનો દાવો છે કે આ સમગ્ર સોદામાં થયેલા કૌભાંડ અંગે મિલાનની પોલીસે એકત્ર કરેલા પુરાવા તેની પાસે છે. એ દસ્તાવેજો ઇટાલિયન ભાષામાં હતા અને તેનું અંગ્રેજી ભાષાંતર દિલ્હીની વિવિધ યુનિવર્સિટીના નિષ્ણાત ભાષાંતરકારો પાસે કરાવવામાં આવ્યું છે. આ બધા પુરાવા ઉપરાંત જે સૌથી નોંધપાત્ર પુરાવો તપાસ એજન્સીઓના હાથમાં આવ્યો છે તે મિશેલ તેમજ તેના સાથીદારની ડાયરી છે. સામાન્ય રીતે ડાયરીની નોંધ અદાલતમાં પુરાવા તરીકે ટકી શકતી નથી. પરંતુ પૂછપરછ અને રિમાન્ડની કાર્યવાહી દરમિયાન આરોપી જો એ ડાયરીની નોંધો પોતે જ લખેલી છે તે સ્વીકારી લે તથા તેમાં કોડવર્ડમાં લખેલી વિગતોનો ખરેખર અર્થ શો થાય છે એ સ્પષ્ટ કરી દે તો એ પુરાવો માન્ય ગણાય. જોવાનું એ રહે છે કે મિશેલ તેની ડાયરીની કોડવર્ડની ભાષાના સાચા અર્થ જાહેર કરવા તૈયાર છે કે કેમ.

અગાઉ કહ્યું તેમ આ કેસ 2014ની લોકસભા ચૂંટણીના પ્રચારમાં પણ ઊછળ્યો હતો અને ત્યારબાદ પણ સતત તેના વિશે આક્ષેપ-પ્રતિઆક્ષેપ થતા રહ્યા છે. સીબીઆઈએ માર્ચ 2017માં પહેલી ચાર્જશિટ દાખલ કરી હતી. તેના આધારે એરફોર્સના ભૂતપૂર્વ વડા ત્યાગીની ધકપકડ પણ થઈ હતી. તે સમયે સીબીઆઈએ અદાલતમાં એવી રજૂઆત કરી હતી કે આ કેસનો મુખ્ય આરોપી બ્રિટિશ નાગરિક ક્રિશ્ચન મિશેલ છે અને તેને પકડીને ભારતમાં લાવવામાં આવે તો આ કેસ આગળ વધી શકે તેમ છે. કેમ કે પોતે કોને કોને લાંચ આપીને અગુસ્તાવેસ્ટલેડ વીવીઆઈપી હેલિકૉપ્ટરનો રૂ. 3600 કરોડનો સોદો પાર પડાવવા માગતો હતો તેનો ખુલાસો તો મિશેલ જ કરી શકે. એ દ્રષ્ટિએ મિશેલનું પ્રત્યાર્પણ ભારત માટે નોંધપાત્ર પુરવાર થઈ શકે તેમ છે. અલબત્ત, સીબીઆઈએ સોમવારે મિશેલના વધુ રિમાન્ડ મેળવવા માટે કોર્ટમાં રજૂઆત કરતાં કહ્યું હતું કે મિશેલ તપાસમાં સહકાર નથી આપતા. હવે ચિંતાજનક વાત એ છે કે મિશેલ તપાસમાં સહકાર ન આપે અને પોતે કોઇને લાંચ ચૂકવી નથી એવું રટણ કર્યા કરે તો આખો કેસ લૂલો પડી જશે અને જેમ બોફર્સ તોપ સોદામાં આજ સુધી કોઈ આરોપી પુરવાર થયો નથી તેમ આ કેસમાં પણ નહીં થાય, એવું જોખમ રહેલું છે.

દેશના નાગરિકો નરેન્દ્ર મોદી સરકાર પાસે એ જ આશા રાખે છે કે બોફર્સ જેવા ભ્રષ્ટાચારના અન્ય કેસોની જેમ અગુસ્તાવેસ્ટલેન્ડ હેલિકૉપ્ટરનો કેસ પણ લૂલો ન પડી જાય એ રીતે તેના સજ્જડ પુરાવા એકત્ર કરવા જોઇએ અને અદાલતમાં રજૂ કરવા જોઇએ. ક્રિશ્ચન મિશેલ નામનો ફિરંગી જો કળા કરીને ફેરવી તોળશે તો ભ્રષ્ટાચારનો વધુ એક કેસ માત્ર રાજકીય મુદ્દો બની રહેશે અને ભારતની પ્રજાના મનમાં પણ એ વાત ઘર કરી જશે કે આ દેશમાં ભ્રષ્ટાચારીઓને કોઈ સજા થતી નથી અને ભ્રષ્ટાચાર માત્ર રાજકીય મુદ્દો જ છે!!